Psalms 45
Kumqondisi wokuhlabela. Njengengoma ethi “Izimbali.” ElamaDodana kaKhora. Imasikili. Ingoma yomtshado
1Inhliziyo yami iyagubhazela ngendaba enkulu nxa ngivuma inkondlo yami ngiyihayela inkosi; ulimi lwami luyipenseli yomlobi ololwazi. 2Uyilikhwa lamakhwa emadodeni wonke engaka lezindebe zakho ziconjwe kuhle ngobunono, njengalokhu uNkulunkulu ekubusisile lanininini. 3Hloma inkemba yakho okhalweni, wena omkhulu; zembathise ngokukhazimula langobukhosi. 4Unjalo usebukhosini bakho khwela enqoleni ulokunqoba umele iqiniso lokuzithoba lokulunga; akuthi isandla sakho sokunene senze izimanga. 5Akuthi imitshoko yakho ecijileyo icibe izinhliziyo zezitha zenkosi; akuthi izizwe ziwe ngaphansi kwezinyawo zakho. 6Isihlalo sakho sobukhosi, O Nkulunkulu, sizakuma nini lanini; intonga yokwahlulela kuhle izakuba yintonga yombuso wakho. 7Uyakuthanda ukulunga kodwa uyabuzonda ububi; ngakho uNkulunkulu, uNkulunkulu wakho usekukhweze ngaphezu kwabakhula bakho ngokukugcoba ngamafutha entokozo. 8Zonke izambatho zakho ziqholiwe ngemure, langenhlaba langekhasiya; ezigodlweni eziceciswe ngezimpondo zendlovu kuqhamuka inhlokomo yeziginci ekuthokozisayo. 9Amadodakazi amakhosi akhona kanye labanye abesifazana abahloniphekayo; kwesokunene sakho ngumlobokazi wesikhosini oceciswe ngegolide lase-Ofiri. 10Lalela, ndodakazi, nanzelela uvule indlebe; khohlwa abakini, lendlu yakwenu. 11Inkosi iyaphelelwa ngobuhle bakho; yihloniphe, ngoba iyinkosi yakho. 12Indodakazi yaseThire izakuza lesipho, amadoda anothileyo azazincengela kuwe. 13Ngaphakathi exhibeni layo inkosazana yibucwazicwazi; isambatho sayo sicecisiwe ngegolide. 14Isiwa enkosini yembethe izivunulo ezelukiweyo; abakhaphi bayo bayayilandela balethwe kuwe. 15Bangeniswa lapho ngentokozo lenjabulo; bangena esigodlweni senkosi. 16Amadodana enu azathatha isikhundla saboyihlo; lizawenza abe ngamakhosana elizweni lonke. 17Ibizo lakho ngizalenza likhunjulwe kokuphela yizizukulwane zonke; yikho-ke izizwe zizakudumisa nini lanini.
Copyright information for
NdeIBE